Marratxo, koloreen iratxoa

Marratxo iratxo bat da, bihurria, jostalaria eta argia, eta mundu majiko batean bizi da. Okerkeria zalea, harekin dabilenak badaki zer duen: ez dio erraz ihes egingo haren magia bihurriari, ez zapatari zahar lasai on-puskak, ez loti nagiak, ezta musikari handi-usteko eta gauzak “ahaztu-zaleak”.....

Izeba Purpuriña nazkatu da oraintxe, hainbeste jolas eta zarata! Marratxori errieta egin dio, ez al duen “sosegatu” behar, eta han bidali du, bidaia luze bat egitera. Purpuriña agintea eta heldutasuna da, eta zer egingo du Marratxo gazteak (103 urte besterik ez du)? Mundua ezagutzera joan behar.

Bidaian barrena, hainbat jende ezagutuko du, era askotakoak denak. Lehenik, arbola harro eta zaputza. “Txiki” deituko dio hark. Iñurri gozoa gero. “Handi” deituko dio hark. Hainbeste kontzeptu berri… Marratxok agenda eta arkatz magikoa erabili beharko ditu, denak jasotzeko. Aurrera doala, pertsonaietako batzuek igelak jango dituzte, eta beste batzuek “BERA JAN NAHIAN” ibiliko dira, saia eta sugea, esate baterako. Baina, eskerrak ume ikusleak hor dauden, haiek salbatuko baitute Marratxo herioren arriskutik! Marratxo eta umeen arteko adiskidetasun hori izango da bidaia bitxi horretako arriskuetatik libre ateratzeko pasa-agiria.